Një billboard me fotografitë e katër ish-krerëve të Ushtrisë Çlirimtare të Kosovës (UÇK) është vendosur në Times Square të New York-ut. Nisma u bë e ditur nga ish-luftëtari i UÇK-së, Shpend Gjocaj, përmes një videoje të publikuar në rrjetet sociale. Billboardi është vendosur në një ekran mbi shitoren Grand Slam.
Sipas Gjocajt, realizimi i kësaj nisme u përball me vështirësi të konsiderueshme, pasi dhjetëra operatorë refuzuan të publikojnë fotografinë dhe mesazhin, duke i vlerësuar ato si politike. Për shkak të këtyre pengesave, organizatorët u detyruan të ndryshojnë përmbajtjen vizuale dhe mesazhin e billboardit. Gjocaj deklaroi gjithashtu se kostoja për shfaqjen e kësaj hapësire u rrit për 20 herë.
Ky veprim ndodh në një kohë të ndjeshme, vetëm dy ditë para se të shpallet aktgjykimi për Hashim Thaçin, Kadri Veselin, Jakup Krasniqin dhe Rexhep Selimin, të cilët po gjykohen në Gjykatën Speciale në Hagë.
Përditësime
Gjykata Speciale në Hagë caktoi datën 16 shtator për shpalljen e aktgjykimit ndaj ish-krerëve të UÇK-së. Ky zhvillim konfirmon afatin përfundimtar për vendimin gjyqësor ndaj Hashim Thaçit, Kadri Veselit, Jakup Krasniqit dhe Rexhep Selimit.