Kryeministri Sébastien Lecornu deklaroi se Franca do të rrisë prodhimin e energjisë bërthamore, e cila tashmë siguron rreth dy të tretat e furnizimit me energji elektrike të vendit, deri në vitin 2030.
Strategjia e re parashikon ndërtimin e gjashtë centraleve të reja bërthamore nga viti 2038, me mundësinë për të shtuar edhe tetë të tjera. Për të mbajtur në rrjet të gjitha 57 centralet ekzistuese bërthamore, më të shumta në Evropë, plani parashikon zgjatjen e jetës së tyre të shërbimit deri në 50 ose 60 vjet. Kjo anulon planet e mëparshme për mbylljen e centralëve më të vjetër.
Franca renditet si prodhuesi i dytë më i madh bërthamor në botë pas SHBA-së dhe eksporton energji elektrike të prodhuar nga centralet bërthamore në vende fqinje.
Rinovueshmet dhe lëndët fosile
Zgjerimi i energjive të rinovueshme mbetet shtylla e dytë e strategjisë, por me ritëm më të ngadaltë në disa fusha. Fermët e erës në det vuajnë mungesë ofertuesish për projekte të planifikuara, ndërsa ato në tokë hasin rezistencë lokale, duke çuar në uljen e targeteve.
Për të ulur varësinë nga lëndët djegëse fosile, qeveria synon të zvogëlojë pjesën e tyre në konsumin e përgjithshëm të energjisë nga 60% në vitin 2023 në 40% deri në 2030 dhe 30% në 2035.
Automjetet elektrike dhe sfondi politik
Ministrja e Mjedisit Monique Barbut njoftoi se synohet që një në tre makina të blera të jetë elektrike deri në vitin 2026, krahasuar me një në pesë vitin e kaluar.
Strategjia u vonua për vite për shkak të mosmarrëveshjeve politike. Konservatorët dhe e djathta favorizojnë energjinë bërthamore, ndërsa e majta dhe ekologjistët kërkojnë investime më të mëdha në rinovueshme.