Bashkimi Evropian po ndjen qartë pasojat e luftës në Iran. Sipas Komisionit Evropian, që nga fillimi i konfliktit kostot për importin e lëndëve djegëse fosile janë rritur me rreth 24 miliardë euro. Disa shtete anëtare kanë ndërmarrë masa për të lehtësuar barrën për konsumatorët dhe bizneset, por deri tani secili ka vepruar veç e veç.
Komisioni Evropian synon të koordinojë procesin dhe ka propozuar masa për përballimin e rritjes së çmimeve të naftës dhe gazit. Presidentja Ursula von der Leyen deklaroi se “duhet të përshpejtojmë kalimin drejt energjive vendase dhe të pastra”, që shtetet anëtare të përballojnë më mirë “stuhi gjeopolitike” në të ardhmen.
Komisioni thekson se vendet me më shumë energji të rinovueshme ose bërthamore, si dhe rrjete më fleksibël me kapacitete dhe mundësi të mjaftueshme magazinimi, janë më pak të prekura nga kriza dhe luhatjet e çmimeve.
Roli i energjisë bërthamore
Në një dokument strategjik të ri, energjia bërthamore konsiderohet përbërës i rëndësishëm për shmangien e emetimeve të CO₂. Mini-centralet bërthamore dhe shmangia e mbylljes së parakohshme të kapaciteteve ekzistuese ndihmojnë në uljen e varësisë nga lëndët djegëse fosile.
Masa të tjera të propozuara
Komisioni Evropian rekomandon lehtësime tatimore për instalimin e pompave për ngrohje, paneleve diellore dhe blerjen e makinave elektrike. Brukseli synon të lehtësojë koordinimin mes shteteve për mbushjen e depozitave të gazit, vënien në dispozicion të rezervave të naftës dhe miratimin e masave kombëtare emergjente.