Autoritetet franceze kanë shpëtuar 6 mijë e 177 emigrantë që tentonin të mbërrinin në Britaninë e Madhe me varka të vogla gjatë vitit 2025, sipas raportit vjetor të publikuar të premten nga prefektura detare për Kanalin dhe Detin e Veriut (PREMAR). Në të njëjtin vit, 25 persona humbën jetën dhe dy të tjerë rezultojnë të zhdukur.
Franca mbetet pikënisje kryesore për emigrantët që synojnë të kalojnë Kanalin e La Manshit. Sipas të dhënave, rreth 50 mijë persona në 795 varka kanë tentuar kalimin nga Franca në Mbretërinë e Bashkuar. Një përllogaritje e AFP-së, bazuar në burime zyrtare franceze dhe britanike, e çon numrin total të viktimave në të paktën 29.
Rritja e rreziqeve
Raporti paralajmëron se trafikantët e qenieve njerëzore po i ekspozojnë emigrantët ndaj rreziqeve më të mëdha. Numri i personave për çdo varkë ka rritur mesataren nga 26 në vitin 2021 në 63 në vitin 2025, ndërsa dhjetë varka kanë transportuar mbi 100 persona secila.
Autoritetet kanë konstatuar përdorimin e vazhdueshëm të "varka-taksi", të cilat nisen fshehurazi pothuajse bosh nga bregu dhe më pas marrin dhjetëra emigrantë në ujëra të cekëta.
Të dhënat britanike
Autoritetet britanike kanë regjistruar 41 mijë e 472 mbërritje me varka të vogla gjatë vitit 2025, shifër e dytë më e lartë pas rekordit prej 45 mijë e 774 mbërritjesh në vitin 2022. Përpjekjet për këtë udhëtim të rrezikshëm nuk janë ngadalësuar, pavarësisht rreziqeve.
Përditësime
Qeveria laburiste britanike po përballet me presion nga grupet e djathta anti-emigracion për të frenuar mbërritjet e emigrantëve.