Iranianët jetojnë mes frikës dhe shpresës ndërsa Shtetet e Bashkuara dhe Izraeli zhvillojnë bombardime ajrore të mëdha në Iran që nga 28 shkurti 2026. Këto sulme synojnë shfarosjen e udhëheqësve klerikalë dhe kanë rrënuar një pjesë të madhe të udhëheqjes, përfshirë vrasjen e udhëheqësit suprem ajatollah Ali Khamenei.
Sulmet kanë vrarë qindra civilë, sipas grupeve humanitare vendase, si dhe kanë shkatërruar shkolla e spitale. Një burrë 56-vjeçar në Teheran deklaroi për Radion Farda, në kushte anonimiteti për arsye sigurie: “Ne ishim të lumtur me lajmin për vdekjen e Khamenei-t. Por, tani këto bombardime të rënda po më shqetësojnë. Irani nuk duhet të shkatërrohet dhe të copëtohet. Shpresoj se e ardhmja të jetë e ndritur”.
Vdekja e Khamenei-t, një autokrat që e sundoi vendin me dorë të hekurt për gati 40 vjet, u festua nga shumë banorë në rrugët e Iranit. Megjithatë, vëmendja u zhvendos shpejt te pasojat e mundshme. Fushata ajrore paraqet kërcënim për teokracinë iraniane dhe, në rast shembjeje të Republikës Islamike, disa frikësohen se vendi me rreth 90 milionë banorë mund të zhytet në luftë civile si Iraku dhe Afganistani.
Një nënë 49-vjeçare në Teheran tregoi për Radion Farda se bombardimet godasin zona të banuara. “Nuk mund të flemë natën dhe njëri nga qentë e mi fshihet në banjë nga frika”, shtoi ajo.
SHBA dhe Izraeli u kanë bërë thirrje iranianëve të ngrihen kundër qeverisë. Megjithatë, nuk ka shenja kryengritjeje në qytetet e mëdha, të cilat mbeten të qeta nën patrullimin e Korpusi i Gardës Revolucionare Islamike (IRGC) dhe forcave paraushtarake Basij.