Federata Shqiptare e Futbollit (FSHF) ka njoftuar të premten mbrëma se të hënën hapet procesi i aplikimit për biletat e ndeshjes Poloni-Shqipëri, e vlefshme për gjysmëfinalen e plejofit të Botërorit 2026. Ndeshja zhvillohet më 26 mars në Varshavë, nga ora 20:45.
Për shkak të numrit të kufizuar të biletave për tifozët shqiptarë, përzgjedhja bëhet me short elektronik në platformën t-Ticket.
Procesi i aplikimit
• Tifozët duhet të regjistrohen paraprakisht duke krijuar llogari personale ose duke përdorur atë ekzistuese.
• Çdo aplikant mund të kërkojë vetëm 2 bileta, pa mundësi për më pak ose më shumë.
• Aplikimi është i hapur për 48 orë.
• Sistemi përzgjedh fituesit në mënyrë rastësore dhe i njofton me email, duke dhënë link personalizuar për pagesë.
• Pagesa kryhet brenda 24 orëve nga njoftimi.
• Pas pagesës, fituesit marrin link për akses dhe biletat shkarkohen në aplikacionin Mobilny System Biletowy.
Në rast fitoreje ndaj Polonisë, Shqipëria luan në udhëtim me fituesen e ndeshjes Ukrainë-Suedi.