Federata Shqiptare e Futbollit ka njoftuar se nga e hëna nis procesi i aplikimit për biletat e ndeshjes Poloni-Shqipëri, të vlefshme për play-off-in e Botërorit 2026. Tifozët shqiptarë mund të aplikojnë përmes platformës t-Ticket.
Për të aplikuar, tifozët duhet të krijojnë paraprakisht një llogari personale në platformë. Çdo aplikant ka të drejtë të kërkojë vetëm dy bileta, pa mundësi për më pak apo më shumë.
Për shkak të numrit të kufizuar të biletave për tifozët kuqezi, përzgjedhja bëhet përmes një shorti elektronik. Procesi i aplikimit do të jetë i hapur për një periudhë 48 orësh. Pas kësaj, sistemi zgjedh rastësor aplikantët fitues.
Fituesit njoftohen me e-mail, ku marrin një link personal për pagesën e biletave. Pas përfundimit të pagesës, ata marrin linkun përkatës për aksesimin e biletave.
Ndeshja Poloni-Shqipëri zhvillohet më 26 mars në Varshavë në orën 20:45. Nëse kombëtarja shqiptare fiton, do të luajë në finalen e play-off-it kundër fituesit të çiftit Ukrainë/Suedi, që dërgon në Botërorin 2026.