Forca e Sigurisë së Kosovës (FSK) ka pranuar 12 kamionë ushtarakë UNIMOG – Mercedes-Benz 5T, 4×4, të blerë për nevojat e saj. Dorëzimi u bë më 29 tetor, në një ceremoni ku morën pjesë kryeministri Albin Kurti, ministri i Mbrojtjes Ejup Maqedonci, komandanti i FSK-së, gjenerallejtënant Bashkim Jashari, ambasadori gjerman në Kosovë Rainer Rudolph dhe Daniel Zittel, përfaqësues i Daimler Truck Defence dhe Mercedes-Benz Special Trucks.
Sipas njoftimeve të Kurtit dhe Maqedoncit, 12 kamionët i janë shtuar flotës prej 15 kamionësh Rheinmetall. Tetë kamionë të tjerë KX 8×8, të blerë nga Rheinmetall, mbërritën gjatë kësaj jave. Me këto prurje, numri i automjeteve të këtyre dy kategorive arrin në 35.
Kamionët UNIMOG janë projektuar për lëvizje në terrene të vështira, përfshirë rrugët e paasfaltuara dhe zonat malore. Sipas njoftimeve, ato do të përdoren për transportimin e personelit, pajisjeve dhe materialeve, si dhe për furnizimin e njësive. Kamionët Rheinmetall me konfigurim 8×8 rrisin kapacitetet transportuese dhe mbështetjen logjistike të FSK-së.
Maqedonci tha se dhjetëra kamionë të tjerë janë blerë dhe pritet të mbërrijnë gjatë vitit 2027. Ai njoftoi gjithashtu se Gjermania i dhuroi FSK-së pesë kamionë Rheinmetall KX 8×8 në vitin 2024. Sipas planifikimit, në vitin 2027 pritet të dhurohen edhe dy kamionë të këtij modeli dhe katër kamionë zjarrfikës UNIMOG – Mercedes-Benz.
Kurti i cilësoi furnizimet pjesë të përpjekjeve për forcimin e kapaciteteve mbrojtëse të Kosovës, në përputhje me standardet e NATO-s. Maqedonci tha se investimet në pajisje, infrastrukturë dhe kapacitete njerëzore do të vazhdojnë, me synimin për zhvillimin e një force profesionale, moderne dhe të ndërveprueshme me partnerët.
Kurti njoftoi edhe për zgjerimin e personelit të FSK-së: 515 rekrutë u betuan të premten e kaluar, ndërsa 209 të tjerë nisën trajnimin në fillim të kësaj jave. Ambasada Gjermane e përshkroi dorëzimin si hap në bashkëpunimin mes industrisë gjermane të mbrojtjes dhe institucioneve të Kosovës. Sipas Kallxo-s, kamionët u dorëzuan nga Daimler Truck AG përmes divizionit të saj të mbrojtjes, Daimler Truck Defence.