Forca e Sigurisë së Kosovës (FSK) ka njoftuar se në Qendrën Nacionale të Trajnimit për Kërkim-Shpëtim ka përfunduar me sukses Trajnimi Bazik i Kërkim-Shpëtimit Malor.
Gjatë këtij trajnimi, pjesëmarrësit përfituan njohuri dhe aftësi të specializuara për operacione në terrene malore. Programi përfshiu orientimin në terren, teknikat bazike të alpinizmit, përdorimin e pajisjeve teknike, menaxhimin e situatave emergjente, operacionet e kërkim-shpëtimit në kushte të vështira si dhe ofrimin e ndihmës së parë në ambiente malore.
Sipas FSK-së, trajnimi u zhvillua në përputhje me standardet profesionale. Ai synon rritjen e kapaciteteve operacionale për reagim efikas në operacione kërkim-shpëtim dhe emergjenca në mjedise malore, në mbështetje të autoriteteve civile.
Njoftimi u bë përmes platformës Facebook, ku theksohet përgatitja më e mirë e pjesëtarëve për situata reale.