Pjesëtarët e Forcës së Sigurisë së Kosovës (FSK) kanë përmbyllur me sukses trajnimin për snajperistë, me synim ngritjen e kapaciteteve luftarake dhe avancimin e aftësive profesionale të personelit ushtarak.
Sipas njoftimit zyrtar, trajnimi kishte për qëllim certifikimin e pjesëmarrësve si snajperistë operativë. Këta ushtarakë tashmë janë të trajnuar për të vepruar sipas standardeve moderne dhe për të përdorur sisteme të ndryshme armësh në misione të ndryshme operative.
Gjatë kësaj periudhe, pjesëtarët e FSK-së zhvilluan aftësi specifike të cilat përfshijnë:
• Qitje precize;
• Taktika fushore;
• Kamuflim dhe vëzhgim;
• Lëvizje taktike;
• Zbatimin e procedurave operacionale në terren.
Forca e Sigurisë së Kosovës theksoi se investimi në zhvillimin profesional dhe operacional të personelit mbetet prioritet, duke rritur gatishmërinë dhe kapacitetet e forcës në përputhje me standardet më të larta ushtarake ndërkombëtare.