Sot, në kazermën “Skënderbeu” në Ferizaj, ka nisur zyrtarisht trajnimi ushtarak bazë për gjeneratën e re të rekrutëve të Forcës së Sigurisë së Kosovës. Procesi zhvillohet në kuadër të Qendrës së Stërvitjes Bazë, e cila funksionon nën autoritetin e Komandës së Doktrinës dhe Stërvitjes.
Sipas njoftimit zyrtar të FSK-së, programi i stërvitjes është hartuar për të qenë intensiv dhe do të zgjasë gjithsej 9 javë. Ky trajnim ka për qëllim forcimin e përgatitjes fizike, psikologjike dhe profesionale të kandidatëve. Gjatë kësaj periudhe, rekrutët do të pajisen me njohuritë dhe aftësitë ushtarake të domosdoshme, me synim që pas përfundimit të këtij cikli, ata të jenë plotësisht të gatshëm për t’iu bashkuar formacioneve ushtarake dhe për të shërbyer si ushtarë në strukturat e Forcës së Sigurisë së Kosovës.
Përditësime
Ministri i Mbrojtjes, Ejup Maqedonci, konfirmoi zyrtarisht fillimin e trajnimit për 550 rekrutët e rinj të FSK-së. Ky numër zyrtar përcakton kapacitetin e plotë të kontingjentit që i është nënshtruar programit 9-javor në kazermën 'Skënderbeu'.