Pas angazhimeve me Kombëtarën shqiptare, futbollistët shqiptarë janë rikthyer te klubet e tyre dhe kanë dhënë paraqitje pozitive në kampionatet ku luajnë.
Një nga lojtarët më të spikur të fundjavës ishte mbrojtësi Ardian Ismajli. Ai zhvilloi një paraqitje solide në sfidën e Torinos kundër Pisas, që u mbyll me fitoren minimale 1-0 në transfertë. Ismajli u shpall lojtari më i mirë i ndeshjes për kontributin në repartin defensiv.
Kontribut vendimtar pati edhe sulmuesi Arbër Hoxha në kampionatin kroat. Ai hyri në lojë në minutën 65-të të ndeshjes Dinamo Zagreb - Osijek, e cila përfundoi 7-0. Tre minuta pas hyrjes, Hoxha dha asistin për Beljo, autor i golit të gjashtë.
Në kampionatin amerikan, sulmuesi Myrto Uzuni ishte aktiv në barazimin 2-2 të Austin kundër Inter Miami. Ai dha pasimin vendimtar për Nelson, që shënoi golin e avantazhit të përkohshëm 2-1 në fillim të pjesës së dytë. Uzuni goditi edhe shtyllën në start të takimit, përballë Lionel Messit.
Si titullarë me skuadrat e tyre luajtën edhe Thomas Strakosha, Klisman Cake, Juljan Shehu, Kristjan Asllani dhe Qazim Laçi, të cilët vazhdojnë të jenë elementë të rëndësishëm për ekipet përkatëse.