Urim Pomari, shqiptar në Angli, u dënua me 2 vite e 4 muaj burg për shitje kokaine, pasi një mesazh i gabuar në WhatsApp zbuloi aktivitetin e tij të paligjshëm. Ngjarja ndodhi vetëm dy javë pasi ai ishte liruar nga burgu më 21 tetor.
Pomari krijoi një grup në WhatsApp ku dërgonte oferta për shitje dozash kokaine, duke përdorur emoji-n e dëborës si kod për drogën. Gabimisht, ai përfshiu në grup edhe numrin e telefonit të oficerit të shërbimit të provës, tek i cili duhej të paraqitej çdo javë.
Oficeri pa mesazhin dhe njoftoi policinë. Autoritetet bastisën banesën e Pomarit në Ipswich, ku gjetën kokainë, peshore për ndarjen e drogës dhe 1,255 paund para cash, të cilat u sekuestruan.
Gjatë seancës gjyqësore, gjyqtarja Nicola Talbot-Hadley u shpreh se Pomari “nuk është një kriminel i sofistikuar” dhe e cilësoi “budallallëk” faktin që kishte dërguar mesazhin tek oficeri i tij i provës. Ajo urdhëroi që paratë e sekuestruara të dërgohen për bamirësi.
Rasti u raportua nga media shqiptare duke iu referuar portalit britanik UKNIP.