Prokurorja Rovena Zoto (Bozo) ka zyrtarizuar kandidaturën e saj për postin e Prokurorit të Përgjithshëm, duke u bërë kështu kandidatja e dytë në garë pas prokurorit të SPAK, Adnan Xholi. Dokumentacioni është dorëzuar pranë Këshillit të Lartë të Prokurorisë (KLP), institucioni përgjegjës për menaxhimin e këtij procesi.
Rovena Zoto, e cila aktualisht shërben si prokurore pranë Prokurorisë së Tiranës, numëron një karrierë 16-vjeçare në sistemin e drejtësisë. Ajo ka përfunduar Shkollën e Magjistraturës në vitin 2010 dhe ka shërbyer ndër vite në prokuroritë e Lushnjës, Fierit dhe Tiranës. Gjatë përvojës së saj profesionale, Zoto është marrë me çështje të krimit ekonomik, pastrimit të parave, financimit të terrorizmit dhe hetimet pasurore. Së fundmi, 43-vjeçarja ka qenë në krye të hetimeve që çuan në goditjen e një rrjeti të paligjshëm të call center-ave, operacion i zhvilluar në bashkëpunim me partnerët austriakë. Në nëntor 2023, ajo u konfirmua në detyrë nga Komisioni i Pavarur i Kualifikimit.
Nga ana tjetër, Adnan Xholi është kandidati i parë që paraqiti platformën e tij për drejtimin e Prokurorisë së Përgjithshme. Xholi, aktualisht prokuror pranë SPAK, njihet për hetimin e dosjeve të rëndësishme, përfshirë ato të përpiluara nga komunikimet në aplikacionin SKY ECC.
Procesi i zgjedhjes së kryeprokurorit të ri, i cili do të zëvendësojë Olsian Çelën pas përfundimit të mandatit të tij në dhjetor 2026, vijon me këto hapa:
• Afati i fundit për dorëzimin e kandidaturave: 1 gusht 2026.
• Verifikimi i kushteve ligjore nga KLP: deri më 14 gusht 2026.
• Përzgjedhja e tre kandidatëve nga KLP dhe përcjellja e tyre në Kuvendin e Shqipërisë.
• Votimi në Parlament: kërkohet shumica prej tre të pestave (3/5) të votave për një mandat 7-vjeçar pa të drejtë riemërimi.
Sipas informacioneve, deri në mbyllje të afatit, pritet që në garë të hyjnë edhe kandidatë të tjerë, ndërsa janë përmendur emra si Fatjona Memçaj, Arta Marku dhe Ylli Pjetërnikaj.
Përditësime
Prokurori Ylli Pjetërnikaj ka zyrtarizuar sot kandidaturën për Prokuror të Përgjithshëm pranë Këshillit të Lartë të Prokurorisë (KLP). Me titullin Doktor i Shkencave Juridike dhe përvojë si pedagog në Shkollën e Magjistraturës, Pjetërnikaj sjell një profil të orientuar drejt drejtimit dhe ekspertizës në krimin kibernetik, fushë në të cilën ka kontribuar në forume ndërkombëtare.