Prokurori Ylli Pjetërnikaj është bërë zyrtarisht kandidati i tretë për postin e Prokurorit të Përgjithshëm, pasi ka dorëzuar dokumentacionin përkatës pranë Këshillit të Lartë të Prokurorisë. Ai i bashkohet listës së kandidatëve ku bëjnë pjesë edhe Adnan Xholi e Rovena Zoto, ndërsa procesi i pranimit të kërkesave vijon deri në datën 1 gusht.
Ylli Pjetërnikaj mban gradën shkencore Doktor i Shkencave në fushën e së drejtës dhe është pedagog në Shkollën e Magjistraturës. Gjatë karrierës së tij profesionale, ai ka ushtruar detyrën e prokurorit në disa qytete, përfshirë Kukësin, Lezhën, Tiranën dhe Shkodrën, ku ka shërbyer edhe si drejtues i institucionit të prokurorisë.
Përveç përvojës në sistemin e drejtësisë, Pjetërnikaj njihet për kontributin e tij në kërkimin shkencor dhe mësimdhënie. Ai është i specializuar në krimin kibernetik përmes programit Chevening Western Balkans Cyber Security Fellowship në Cranfield University. Ai është gjithashtu anëtar i Bordit Editorial të International Association of Prosecutors (IAP) dhe të Association Internationale de Droit Pénal (AIDP).
Sipas të dhënave të bëra publike, kandidati ka dhënë ndihmesën e tij në hartimin e legjislacionit penal, në zhvillimin e reformës në drejtësi, si dhe në procesin e integrimit europian të Shqipërisë, duke përfaqësuar vendin në forume të ndryshme ndërkombëtare të nivelit të lartë.