Qeveria shqiptare, me vendim të Këshillit të Ministrave të datës 31 korrik 2025, vendosi një fond prej 3 miliardë lekësh garanci sovrane për lehtësimin e kreditimit të fermerëve nga sektori bankar. Të dhënat e Ministrisë së Financave tregojnë se deri në fund të vitit 2025 shuma e shfrytëzuar arriti vetëm 366 milionë lekë, pra 12% të fondit total.
Ministria e Financave garantoi 70% të vlerës së huave, me një shumë maksimale kredie prej 25 milionë lekësh për secilin beneficiar. Skema synonte subjektet mikro, të vogla dhe të mesme, si dhe fermerët e regjistruar me certifikatën e NIPT-it të fermerit, në përputhje me prioritetet e bujqësisë dhe zhvillimit rural.
Kushtet e skemës përcaktonin:
• Normën e interesit jo më të lartë se 2%;
• Tarifat totale kundrejt huamarrësve jo më shumë se 0.5%;
• Periudhë pa pagesë principale (grace period) jo më pak se 12 muaj;
• Afat maksimal huash 5 vjet.
Afati i aplikimit pranë huamarrësve përfundoi më 20 nëntor 2025, duke lënë një periudhë relativisht të shkurtër për zbatim. Gjatë muajit shkurt 2026, Ministri i Financave dhe Ministri i Bujqësisë zhvilluan një takim me drejtuesit e bankave tregtare për të mbledhur sugjerime mbi mundësitë e përmirësimit të këtij mekanizmi.