Donika Gërvalla, ministre Drejtësie e Kosovës, theksoi se nuk ka asnjë pritje nga Gjykata Speciale në Hagë sa i përket vendimit final për katërshenë e UÇK-së. Deklarata u bë gjatë një konference shtypi pas mbledhjes së Qeverisë, më 30 mars 2026.
Gërvalla vuri në dukje se duhet shtruar pyetja pse të akuzuarit janë mbajtur kaq gjatë në paraburgim. Ajo shtoi se nuk i takon të japë rekomandime apo udhëzime gjykatës, e cila është votuar nga Kuvendi i Kosovës.
"Nuk kam asnjë mendim dhe asnjë pritje nga Gjykata. Ajo duhet ta përfundojë procesin. Tepër gjatë janë mbajtur të akuzuarit në paraburgim, shtrohet pyetja pse kaq gjatë, mirëpo nuk më takon mua në këtë fazë të jap as rekomandime apo udhëzime gjykatës së votuar nga Kuvendi i Kosovës se çfarë duhet të bëjnë në këtë fazë", tha ajo.
Ndryshe, në Dhomat e Specializuara në Hagë, fjalët përmbyllëse në rastin Thaçi dhe të tjerët nisën më 9 shkurt të këtij viti. Katërshja – Hashim Thaçi, Kadri Veseli, Rexhep Selimi dhe Jakup Krasniqi – paraqitën fjalët e tyre më 18 shkurt, duke u deklaruar të pafajshëm për të gjitha akuzat e Zyrës së Prokurorit të Specializuar. Ekipet mbrojtëse kërkuan shpalljen e tyre të pafajshme për të gjitha pikat e aktakuzës.
Kryeprokurorja e Specializuar, Kimberly West, kërkoi dënim me burgim prej 45 vitesh për secilin nga ish-krerët e UÇK-së për krime lufte.
Gjykimi ndaj tyre nisi më 3 prill 2023, gati tre vjet pas konfirmimit të aktakuzës. Të akuzuarit mbahen në qendrën e paraburgimit në Hagë.