Një aksident trafiku ka ndodhur sot rreth orës 15:00 në segmentin rrugor të fshatit Rakinicë në rrugën rajonale Skënderaj-Klinë. Në ngjarje janë përfshirë dy automjete dhe si pasojë kanë pësuar lëndime trupore gjashtë persona.
Zëdhënësi i Policisë së Kosovës për rajonin e Mitrovicës, Avni Zahiti, ka konfirmuar se të lënduarit janë dërguar për trajtim mjekësor. Njësite policore kanë dalë në vendngjarje dhe po hetojnë rrethanat e aksidentit.
Të lënduarit kanë kërkuar ndihmë mjekësore rreth orës 15:45 në Shërbimin Emergjent të Spitalit të Përgjithshëm Sami Haxhibeqiri në Mitrovicë. Zëdhënësi i spitalit, Shpend Fazliu, ka deklaruar se stafi po kryen ekzaminimet e nevojshme. Sipas vlerësimeve fillestare, lëndimet janë të lehta trupore dhe ekzaminimet radiologjike vazhdojnë për të gjithë të lënduarit.