Gjashtë vende anëtare të Bashkimit Evropian po bëjnë thirrje për një kuadër të përbashkët taksimi ndaj kompanive të naftës, duke argumentuar se këto subjekte po shënojnë fitime dhe marzhe të larta që tejkalojnë rritjen e çmimeve të naftës bruto. Iniciativa, e udhëhequr nga ministrat e financave të pesë shteteve dhe ministri i Ekonomisë i Spanjës, kërkon që çështja të përfshihet në agjendën e takimit të radhës të ministrave të financave të BE-së, që pritet të mbahet muajin e ardhshëm në Dublin.
Sipas ministrave, ky hap është i domosdoshëm për shkak të pasigurisë së furnizimit me energji pas operacioneve ushtarake të SHBA-së dhe Izraelit kundër Iranit, si dhe ndërprerjeve të transportit në Ngushticën e Hormuzit. Propozuesit i referohen përvojës së vitit 2022, kur u vendos një taksë e përkohshme në nivel evropian pas pushtimit rus të Ukrainës.
Ministri gjerman i Financave, Lars Klingbeil, theksoi se fitimet e krijuara gjatë krizës duhet t'u rikthehen konsumatorëve për të lehtësuar barrën e rritjes së kostos së jetesës. Megjithatë, brenda vetë Gjermanisë ekziston një përplasje politike: ndërsa SPD e mbështet këtë nismë, CDU e kancelarit Friedrich Merz shprehet kundër saj.
Ndonëse raportimet flasin për një letër zyrtare, burime për Euronews bëjnë të ditur se letra nuk është përfunduar ende dhe se drafti mbetet në fazë paraprake. Deri tani, Bashkimi Evropian nuk ka marrë një vendim zyrtar lidhur me këtë kërkesë.
Përditësime
Ministrat e shteteve nismëtare kërkuan zyrtarisht përfshirjen e taksimit të fitimeve të jashtëzakonshme në axhendën e takimit të ardhshëm të ministrave të Financave të BE-së në Dublin. Në draft-letër, zyrtarët argumentojnë se kompanitë energjetike po gjenerojnë fitime të tepruara përmes marzheve të larta të produkteve të rafinuara, të cilat tejkalojnë rritjen e çmimit të naftës bruto.