Komisioni Qeveritar për Persona të Zhdukur ka njoftuar se ka rifilluar gërmimet vlerësuese në Rahovec, në lokacionin e njohur si “Përzhina” sipas evidencave kadastrale dhe komunitetit lokal. Gërmimet u zhvilluan më 4 mars 2026, në vijim të punimeve të vitit të kaluar. Gjatë tyre u gjetën mbetje mortore, të cilat u zhvarrosën dhe u dërguan për ekzaminim në Institutin për Mjekësi Ligjore, në përputhje me procedurat ligjore dhe standardet forenzike.
Numri i saktë i individëve dhe identiteti i tyre do të përcaktohet vetëm pas përfundimit të analizave forenzike. Ekipet përfshijnë mjekë ligjorë nga Instituti për Mjekësi Ligjore, ekspertë të EULEX-it, me përkrahjen e Komisionit dhe të Drejtorisë së Policisë për Hetimin e Krimeve të Luftës. Punimet zbatojnë urdhëresën e Gjykatës Themelore në Prishtinë për zhvarrosje, autopsi dhe identifikim.
Gërmimet në këtë zonë u ndërprerën në dhjetor 2025 për shkak të kushteve atmosferike dhe faktorëve operacionalë. Atëherë u zhvarrosën mbetje mortore të dy individëve dhe u gjetën pjesë kockore. Dyshimet e hershme flisnin për mbetje të tetë viktimave, ndërsa më parë kanë kërkuar ekipe të Tribunalit të Hagës dhe të UNMIK-ut.
Gjatë 2025-s u kryen gërmime në 33 lokacione, ku u gjetën mbetje mortore të 22 individëve. Nga lufta e fundit në Kosovë (1998-1999) rezultojnë të zhdukur 1 577 persona. Procesi i gërmimeve pritet të vazhdojë gjatë 2026-s.