Trupi i pajetë i 39-vjeçares Anastasiia Berezovska u zbulua mbrëmjen e 6 korrikut në rajonin e Kievit, me plagë të shkaktuara nga armë zjarri. Viktima ishte shpallur në kërkim ndërkombëtar nga Interpoli si autorja kryesore e dyshuar e atentatit me bombë ndaj biznesmenit ukrainas Vadim Yermolaiev, ngjarje e ndodhur më 29 qershor në Monako.
Në lidhje me vrasjen e saj, autoritetet ukrainase kanë vënë në pranga dy persona: një oficer aktual i Drejtorisë Kryesore të Inteligjencës dhe një ish-zyrtar i forcave të rendit. Hetuesit po shqyrtojnë mundësinë e lidhjes mes vrasjes së saj dhe sulmit në Monako.
Sipas hetimeve, Berezovska dyshohet se ka vendosur një pajisje shpërthyese pranë apartamentit ku qëndronte Yermolaiev, e maskuar si burrë. Nga shpërthimi, biznesmeni Yermolaiev mbeti në gjendje kritike, ndërsa partnerja e tij, 46-vjeçarja Anna Nasobina, pësoi dëmtime të rënda duke humbur të dyja këmbët. Gjithashtu, djali 13-vjeçar i saj pësoi lëndime.
Sipas burimeve hetimore, Berezovska ishte larguar nga Monako pas sulmit dhe, pas një qëndrimi në Gjermani, ishte kthyer në Ukrainë më 1 korrik. Autoritetet e Monakos po vijojnë hetimet për të zbardhur nëse atentati ndaj biznesmenit, i cili më parë kishte qenë subjekt i sanksioneve në Ukrainë, lidhet me mosmarrëveshje biznesi në qytetin e Dnipro-s.
Përditësime
Hetimet për vrasjen në Kiev, ku mbeti viktimë një e dyshuar për atentatin në Monako, kanë zbuluar prova të reja. Policia raportoi detajet vijuese:
- Ekspertët mjeko-ligjorë konfirmuan se viktima u qëllua me armë zjarri në kokë, ndërsa në vendngjarje u sekuestruan gëzhoja pistolete.
- Shërbimet e inteligjencës arrestuan autorin, i cili ka pranuar krimin, duke pretenduar se ka vepruar pa urdhrin e eprorëve.
- Gjatë kontrollit në banesën e njërit prej të dyshuarve, hetuesit zbuluan një dhomë të përshtatur për torturë dhe prova të transfertave të vazhdueshme financiare (në monedhë fiat dhe kriptomonedha) mes të arrestuarve dhe viktimës.
- Prokuroria po heton lidhjen e të arrestuarve me sulmin me bombë të ndodhur më herët në Monako.