Autoritetet e Monakos, në bashkëpunim me policinë franceze dhe agjenci të tjera evropiane, po vijojnë kërkimet për Anastasia B., e cila dyshohet se vendosi një mjet shpërthyes në formë pakoje para banesës së biznesmenit ukrainas Vadim Ermolaev. Identifikimi i saj u bë i mundur nëpërmjet dëshmive dhe gjurmimit të lëvizjeve, ndërsa hetuesit kanë vërejtur se ajo posedon aftësi për t'u maskuar si mashkull, çka ka komplikuar identifikimin e saj të menjëhershëm.
Ngjarja ndodhi mbrëmjen e 29 qershorit, pak para orës 21:00. Sipas hetimeve, autorja kishte monitoruar për disa ditë lëvizjet e familjes. Kur familja iu afrua banesës, autorja aktivizoi eksplozivin me telekomandë. Nga shpërthimi mbeti e plagosur rëndë Anna Nasobina, e cila ka pësuar amputim të të dyja këmbëve, ndërsa djali 13-vjeçar i çiftit pësoi lëndime të lehta.
Në lidhje me lëvizjet e të dyshuarës, hetimet tregojnë se ajo ka përdorur një automjet të marrë me qira në Gjermani, të cilin e kishte marrë në Beausoleil, Francë. Edhe pse është raportuar se autorja mund të jetë larguar drejt Italisë bazuar në gjurmimin e sinjalit të telefonit celular, hetuesit po shqyrtojnë disa pista. Fokus i punës së policisë mbetet përcaktimi i motivit, ku po vlerësohet mundësia e përfshirjes së grupeve të krimit të organizuar ose shërbimeve sekrete, duke pasur parasysh profilin e lartë të viktimës.