Mbrëmjen e së hënës, një shpërthim i shkaktuar nga një mjet shpërthyes i improvizuar tronditi Principatën e Monakos. Ngjarja ndodhi në hyrje të Fondacionit Cuomo, në lagjen Moulins, ku një bombë e vendosur në katin përdhes të një pallati shkaktoi plagosjen e tre anëtarëve të një familjeje me shtetësi ukrainase.
Të plagosurit, një çift i moshës 50-60 vjeç dhe djali i tyre adoleshent, u transportuan për ndihmë mjekësore. Dy të rriturit janë dërguar në Spitalin Pasteur në Nicë, ndërsa i mituri është shtruar në Spitalin Pediatrik Lenval. Deri më tani, nuk ka të dhëna zyrtare lidhur me gjendjen e tyre shëndetësore.
Hetuesit po analizojnë pamjet nga kamerat e sigurisë, të cilat dyshohet se kanë regjistruar një burrë duke lënë një çantë shpine në vendngjarje pak çaste para shpërthimit. Media franceze raportojnë se shënjestra e sulmit mund të ketë qenë biznesmeni Vladimir Ermolaev, i cili renditet ndër personat më të pasur në Ukrainë nga revista Forbes. Megjithatë, autoritetet zyrtare ende nuk e kanë konfirmuar identitetin e objektivit të sulmit.
Policia e Monakos, në bashkëpunim me shërbimet e emergjencës nga Franca, ka rrethuar zonën dhe ka nisur një operacion kërkimi për autorin. Operacioni është shtrirë edhe në qytetin fqinj të Beausoleil, ku besohet se i dyshuari është larguar pas incidentit. Hetimet mbeten të hapura për të zbardhur motivet dhe rrethanat e plota të ngjarjes.
Përditësime
Policia ka identifikuar biznesmenin Vladimir Ermolaev, bashkëshorten dhe djalin e tij si tre të plagosurit nga shpërthimi i sotëm në Monako. Ermolaev renditet në vendin e 23-të në listën e 100 ukrainasve më të pasur sipas revistës Forbes.