Operacioni i kërkimit për Gramoz Grymshin përfundoi paraditen e kësaj të diele, pasi forcat e rendit lokalizuan trupin e tij në një guvë në fshatin Drizë të bashkisë Kuçovë. Gjetja erdhi pas denoncimit të familjarëve, të cilët kishin kërkuar ndihmën e policisë dy ditë më parë, pas largimit të 58-vjeçarit nga banesa dhe moskthimit të tij.
Sipas të dhënave nga terreni, kërkimet u përqendruan pranë guvës pasi banorë të zonës kishin raportuar se e kishin parë viktimën teksa hynte në atë ambient. Pasi u bë e mundur nxjerrja e trupit, këqyrja paraprake nga grupi hetimor konfirmoi mungesën e shenjave të dhunës.
Autoritetet dyshojnë se humbja e jetës mund të ketë ndodhur për shkak të mungesës së oksigjenit në mjedisin e mbyllur ku ndodhej viktima. Trupi është transportuar në morgun e Spitalit Rajonal të Beratit, ku pritet t'i nënshtrohet autopsisë mjeko-ligjore për përcaktimin e shkakut zyrtar të vdekjes. Policia vijon veprimet procedurale për zbardhjen e plotë të rrethanave të kësaj ngjarjeje.
Përditësime
Anëtarët e Shërbimit të Kërkim-Shpëtimit Malor gjetën trupin e pajetë të 58-vjeçarit në fshatin Drizë. Sipas familjarëve, viktima vuante prej disa muajsh nga probleme të shëndetit mendor.