Një person i pajetë është gjetur në ujërat e lumit Mat, në fshatin Zenisht, pasi u konstatua nga banorët e zonës. Pas njoftimit, forcat e policisë dhe ekipet e spitalit të Burrelit mbërritën në vendngjarje për nxjerrjen e trupit dhe transportimin e tij drejt Institutit të Mjekësisë Ligjore në Tiranë për ekspertizë.
Sipas njoftimit zyrtar të policisë, bëhet fjalë për shtetasin F.K., 56 vjeç, banues në Tiranë. Nga këqyrja paraprake nuk janë vërejtur shenja dhune, ndërsa hetuesit dyshojnë se vdekja ka ardhur si pasojë e mbytjes në ujë. Familjarët kishin raportuar largimin e tij nga banesa që prej ditës së enjte, për shkak se vuante nga demenca dhe probleme të theksuara të kujtesës.
Grupi hetimor, nën drejtimin e Prokurorisë, po vijon veprimet për të zbardhur rrethanat e plota të kësaj ngjarjeje.