Trupi i pajetë i shtetasit Mihal Zoi, 61 vjeç, u konstatua ditën e sotme, rreth orës 11:00, përballë ishujve të Ksamilit në Sarandë. Gjatë kontrolleve, shërbimet e Policisë gjetën edhe mjetin lundrues të viktimës, i cili rezultonte i fundosur.
Sipas të dhënave paraprake, dyshohet se viktima kishte dalë për peshkim mbrëmjen e kaluar, në kohën kur zona u përfshi nga kushte të rënduara atmosferike dhe stuhi. Grupi hetimor, nën drejtimin e Prokurorisë, po kryen veprimet procedurale për zbardhjen e plotë të rrethanave të ngjarjes. Aktualisht, po shqyrtohen dy pista kryesore: ajo e një mbytjeje aksidentale për shkak të motit të keq dhe ajo e një vetëmbytjeje.
Nga informacionet e mbledhura rezulton se 61-vjeçari ishte i divorcuar, ndërsa fëmijët e tij jetojnë në Greqi. Në Shqipëri, viktima nuk kishte familjarë të tjerë, përveç një motre.