Një aksident detar me pasojë vdekjen është regjistruar mbrëmjen e së dielës në gjirin e Ksamilit. Shtetasi Albiano Kreçi, 22 vjeç, banues në Ksamil, ka ndërruar jetë pasi mjeti i tij lundrues tip jet ski është përplasur me një skaf të Policisë Kufitare të Sarandës.
Sipas njoftimit zyrtar të Policisë, skafi i patrullës ishte i stacionuar rreth 400 metra larg bregut, në momentin kur po kryente monitorimin e hapësirës detare. Dyshohet se shkaku i përplasjes ka qenë lundrimi me shpejtësi i 22-vjeçarit. Pas goditjes, drejtuesi i mjetit u nxor nga deti nga punonjësit e policisë dhe drejtues të tjerë të mjeteve lundruese që ndodheshin në zonë. Ai u transportua me urgjencë drejt spitalit, por përkundër ndihmës së parë, nuk arriti t’u mbijetonte plagëve të marra.
Në lidhje me këtë ngjarje është ngritur një grup i posaçëm hetimor, i cili nën drejtimin e Prokurorisë dhe në bashkëpunim me Agjencinë e Mbikëqyrjes Policore (AMP), po punon për sqarimin e plotë të rrethanave dhe shkakut të aksidentit. Raportimet e para sugjerojnë se në spitalin e Sarandës janë dërguar edhe persona të tjerë për ndihmë mjekësore, ndërsa mjeti lundrues i përfshirë në përplasje është fundosur.