Mesditën e kësaj të enjteje, tre automjete janë përfshirë në një aksident në rrugën nacionale që lidh Sarandën me Ksamilin, pranë vendit të quajtur Manastiri. Ngjarja ka shkaktuar dëme të konsiderueshme materiale, ndërsa qarkullimi rrugor në këtë aks ka qenë i ndërprerë për disa minuta për shkak të ndërhyrjes së shërbimeve të emergjencës.
Shtetasit spanjollë të përfshirë në aksident, Jove Pibrall Jove (24 vjeç) dhe Catia Picac (37 vjeçe), u dërguan fillimisht në Urgjencën e Spitalit të Sarandës. Sipas njoftimeve mjekësore, 24-vjeçari ka pësuar dëmtime në pjesën e mesit, çka ka kërkuar transportimin e tij drejt Spitalit Universitar të Traumës në Tiranë. Ndërkohë, 37-vjeçarja, e cila ka pësuar dëmtime në kokë, po merr ndihmën e nevojshme në Spitalin e Sarandës dhe ndodhet jashtë rrezikut për jetën.
Shërbimet e Policisë kanë mbërritur menjëherë në vendngjarje për të normalizuar qarkullimin dhe për të nisur hetimet në lidhje me shkaqet e përplasjes. Deri në këtë moment, nuk ka një njoftim zyrtar mbi rrethanat apo përgjegjësit e këtij aksidenti.