Një ngjarje e rëndë ka ndodhur mbrëmjen e së hënës, rreth orës 18:30, në ujërat e Gjirit të Ksamilit. Shtetasi Albjano Kreçi, 22 vjeç, banues në Ksamil, ka humbur jetën si pasojë e dëmtimeve të marra nga përplasja e mjetit të tij lundrues (jet ski) me një skaf të Policisë Kufitare të Sarandës.
Sipas njoftimit zyrtar të Policisë së Shtetit, mjeti i policisë ishte i stacionuar dhe po kryente monitorim të hapësirës detare në momentin kur ka ndodhur goditja. Dyshohet se shkaku i aksidentit ka qenë lundrimi me shpejtësi i 22-vjeçarit. Pas përplasjes, punonjësit e policisë dhe drejtues të tjerë të mjeteve lundruese në zonë kanë ndërhyrë për ta nxjerrë të riun nga deti. Ai është transportuar me urgjencë drejt spitalit, por nuk ka mundur t’u mbijetojë plagëve të marra.
Në lidhje me këtë ngjarje është ngritur një grup i posaçëm hetimor, i cili nën mbikëqyrjen e Prokurorisë dhe në bashkëpunim me Agjencinë e Mbikëqyrjes Policore, po vijon veprimet për sqarimin e plotë të dinamikës së rastit. Sipas raportimeve, mjeti lundrues i viktimës është mbytur pas goditjes.
Përditësime
Pamjet e publikuara konfirmojnë se mjeti ujor i tipit 'Jet Car' po lëvizte me shpejtësi të lartë gjatë përplasjes fatale në Ksamil. Policia e Shtetit po vijon hetimet për të verifikuar nëse ka persona të tjerë të lënduar si pasojë e incidentit.
Ekipet e shpëtimit nxorën nga thellësia prej 34 metrash mjetin 'Jet Car' të viktimës, i cili do t'i nënshtrohet ekspertizës si provë materiale. Në vijim të hetimeve, Policia Kufitare ka bllokuar për verifikim 8 mjete lundruese: 7 në Ksamil dhe 1 në Sarandë.
Zhytësit e Policisë së Shtetit kanë nxjerrë nga thellësia mjetin lundrues tip 'Jet Car', të përfshirë në aksidentin fatal në Ksamil. Mjeti është sekuestruar nga Prokuroria e Sarandës për ekspertim teknik, ndërsa grupi hetimor vijon mbledhjen e provave për zbardhjen e rrethanave të përplasjes.