Pas disa orësh kërkimesh, 20-vjeçari Shkëllzen Kastrati është gjetur shëndoshë e mirë. I riu kishte humbur kontaktet me familjen që prej mbrëmjes së së dielës, kur ishte nisur drejt bjeshkëve të fshatit Pus i Thatë në Has për të kërkuar lopët e tij.
Shqetësimi i familjarëve ishte i madh për shkak se i riu vuan nga probleme të lehta të shëndetit mendor dhe nuk kishte marrë me vete telefonin personal. Menjëherë pas konstatimit të mungesës së tij, u organizua një operacion kërkimi në terrenin malor, ku morën pjesë familjarë, banorë të zonës dhe gjahtarë.
Gjithashtu, familjarët kishin njoftuar edhe Policinë e Kukësit për situatën. Për fat të mirë, operacioni u mbyll me sukses pas disa orësh, duke sjellë lehtësim për të gjithë të përfshirët në kërkime, të cilët ishin mobilizuar për gjetjen e 20-vjeçarit në zonën e bjeshkëve.