Ambasada Gjermane në Tiranë ka njoftuar se Gjermania, përmes Fondit Start, ka vënë në dispozicion 250.000 paund për organizatën joqeveritare britanike World Vision UK. Kjo ndihmë do të mbështesë afërsisht 400 familje ose rreth 1.800 persona të prekur nga përmbytjet e rënda të javëve të fundit në Shqipëri.
Ndihma synon kryesisht rajonet më të prekura në Durrës, duke përfshirë:
- Sukth;
- Katund i Ri;
- Kënetë;
- Rrashbull;
- Porto Romano;
- Shkozet;
- Nishtullë.
Masat e parashikuara përfshijnë:
- ndihma sanitare dhe higjienike;
- strehim emergjent dhe artikuj jo-ushqimorë;
- masa mbrojtëse, përfshirë mbrojtjen nga dhuna gjinore;
- siguri ushqimore;
- nevojat jetike.
Ambasada thekson se Gjermania mbështet gjithashtu zhvillimin e sistemeve të paralajmërimit të hershëm për ngjarje ekstreme të motit. Kjo bëhet përmes projektit ALBAdapt të GIZ, që ndihmon në parashikimin më të mirë të tyre dhe merrjen e masave parandaluese nga banorët.