Në një dalje publike, zëdhënësi i Ministrisë së Jashtme të Gjermanisë, Martin Giese, u përgjigj pyetjeve lidhur me protestat e vazhdueshme në Tiranë. Zyrtari gjerman u pyet nëse Berlini zyrtar është në kontakt me protestuesit, çfarë kërkesash kanë ata dhe çfarë pret qeveria gjermane nga kabineti i Edi Ramës.
Në përgjigjen e tij, Giese nënvizoi se qytetarët në Shqipëri kanë të drejtë të protestojnë. Megjithatë, ai refuzoi të komentojë më gjerësisht, duke deklaruar se zhvillimet janë një çështje e brendshme politike e vendit.
"Sigurisht njerëzit në Shqipëri kanë të drejtë të protestojnë, por kjo është një çështje e brendshme politike. Për këtë nuk mund të japim më shumë informacion", u shpreh Giese.
Përditësime
Ministria e Jashtme e Gjermanisë deklaroi se protestat në Tiranë lidhen me një projekt specifik, duke i cilësuar ato si çështje të brendshme. Përgjigjja erdhi pas pyetjeve të gazetarëve të Deutsche Welle gjatë konferencës zyrtare të qeverisë gjermane.
Protestat kundër një projekti infrastrukturor në Tiranë kanë hyrë në javën e tretë. Autoritetet gjermane konfirmuan se janë të njohura me zhvillimet, por mbajnë qëndrimin se kjo mbetet çështje e brendshme e Shqipërisë.