Bashkëkryetarët e Komisionit të Posaçëm Parlamentar për Reformën Zgjedhore, Damian Gjiknuri dhe Oerd Bylykbashi, zhvilluan një takim me delegacionin e ODIHR-it. Delegacioni përbëhej nga Kakha Inaishvili, Raul Mureșan dhe Nataliya Vasylevska.
Gjatë takimit, Gjiknuri dhe Bylykbashi i informuan përfaqësuesit e ODIHR-it për ecurinë e deritanishme të punës në komision. Ata njoftuan se javën e ardhshme ekspertët do të prezantojnë projektligjin e ri për financimin e partive politike para anëtarëve të komisionit.
Gjiknuri theksoi se miratimi i këtij projektligji, si prioriteti i parë, do të lejojë komisionin të nisë adresimin e rekomandimeve të OSBE/ODIHR-it sa i përket Kodit Zgjedhor. Misioni i ODIHR-it premtoi bashkëpunim të ngushtë me ekspertët shqiptarë për gjetjen e zgjidhjeve teknike në përputhje me standardet më të mira ndërkombëtare për zgjedhjet.