Kryetari i Aleancës për Ardhmërinë e Kosovës, Ardian Gjini, ka zhvilluar një takim me eurodeputetin Riho Terras, raportues i përhershëm i Parlamentit Evropian për Kosovën. Fokus i bisedimeve ishin proceset aktuale nëpër të cilat po kalon vendi dhe nevoja për krijimin sa më të shpejtë të institucioneve funksionale.
Gjini theksoi se integrimi në NATO dhe Bashkimin Evropian mbetet mbi çdo interes tjetër për Kosovën. Ai vlerësoi se Aleanca për Ardhmërinë e Kosovës mbetet e përkushtuar në këtë orientim strategjik. Sipas tij, Kosova po përballet me një periudhë sfiduese si pasojë e papërgjegjësisë politike, e cila ka sjellë pasoja të ndjeshme.
"Po humbim fonde të BE-së, po rrezikojmë procese të rëndësishme integruese dhe, në të njëjtën kohë, populli i Kosovës po mbetet në paqartësi të vazhdueshme, me ekonomi të brishtë, korrupsion të lartë, si dhe me paqartësi serioze për të ardhmen", deklaroi Gjini.
Në fund të takimit, kryetari i AAK-së e falënderoi raportuesin Terras për angazhimin e tij dhe për insistimin që Kosova të bëjë hapa përpara në rrugën e integrimit drejt Bashkimit Evropian.