Raportuesi për Kosovën në Parlamentin Evropian, Riho Terras, ka deklaruar se vendi ka humbur një vit të tërë për shkak të një gjendjeje të vazhdueshme të zgjedhjeve dhe fushatave, çka ka ndikuar në proceset integruese drejt Bashkimit Evropian. Sipas Terras, prioriteti kryesor është krijimi sa më i shpejtë i një koalicioni qeveritar funksional që do të mundësonte zbatimin e reformave të planifikuara.
Në një intervistë për Info Magazine në Klan Kosova, eurodeputeti kërkoi që forcat politike të lënë mënjanë diferencat dhe të gjejnë një emërues të përbashkët. Ai theksoi se një qeveri e qëndrueshme është e domosdoshme për të pasur një partner në bisedimet për statusin e vendit kandidat dhe hapjen e negociatave të pranimit.
Terras vlerësoi se Kosova mbetet në një rrugë të mirë, duke shtuar se përfaqësues të institucioneve evropiane, përfshirë komisioneren për zgjerim, Marta Kos, kanë dërguar porosi të njëjta rreth nevojës për qeverisje funksionale.
Sfida kryesore në procesin e anëtarësimit mbetet fakti që pesë shtete anëtare të Bashkimit Evropian nuk e njohin Kosovën. Riho Terras konfirmoi se Parlamenti Evropian po angazhohet në përpjekje diplomatike për të kuptuar qëndrimet e këtyre vendeve, duke qenë se kanë kaluar më shumë se 20 vite zhvillimesh rajonale pa një zgjidhje të qartë prej tyre.