Raportuesi Terras vlerëson stabilitetin institucional në Kosovë

Raportuesi për Kosovën në Parlamentin Evropian, Riho Terras, ka përshëndetur zgjedhjen e Justina Shiroka-Pules në postin e Presidentes së vendit. Në reagimet e tij të publikuara përmes platformës X, Terras vlerësoi se evitimi i zgjedhjeve të parakohshme krijon kushtet e nevojshme për fokusim te agjenda evropiane. Sipas Terras, stabiliteti i ri institucional duhet të shndërrohet në një shtysë për zhvillim konkret. Prioritetet që ai ka renditur për institucionet e Kosovës përfshijnë: • Avancimin e reformave; • Nxitjen e rritjes ekonomike; • Forcimin e sundimit të ligjit. Duke iu referuar mbështetjes popullore, Terras nënvizoi se qytetarët e Kosovës e mbështesin në masë dërrmuese anëtarësimin e vendit në Bashkimin Evropian. Në cilësinë e raportuesit, ai shprehu gatishmërinë për të intensifikuar bashkëpunimin me institucionet kosovare, duke shprehur gjithashtu synimin për të realizuar një takim me Presidenten e re. Procesi i zgjedhjes së Justina Shiroka-Pules erdhi pas një marrëveshjeje të arritur nga VV dhe PDK, e cila përfshiu edhe miratimin në lexim të dytë të ndryshimeve për Ligjin për Specialen.