Në një artikull të publikuar në median amerikane Quartz, autorja Cris Tolomia ka evidentuar një listë me 20 destinacione europiane që po sfidojnë qytetet më të njohura të kontinentit për sa i përket vlerës turistike. Shqipëria përfaqësohet në këtë renditje nga Gjirokastra, Berati dhe bregu shqiptar i Liqenit të Ohrit.
Sipas analizës, këto destinacione karakterizohen nga ndërthurja e historisë, arkitekturës së veçantë dhe çmimeve që pasqyrojnë ekonominë lokale. Për dallim nga qytetet e mëdha europiane si Dubrovniku, Praga, Venecia, Amsterdami apo Barcelona, të cilat përballen me mbipopullim dhe rritje të ndjeshme të kostove, destinacionet e përzgjedhura kanë ruajtur identitetin e tyre kulturor.
Faktorët kyç që kanë nxitur këtë vlerësim janë shërbimet tradicionale që u shërbejnë kryesisht banorëve vendas dhe qendrat historike lehtësisht të eksplorueshme në këmbë. Këto zona, të shtrira kryesisht në Ballkan, vendet baltike dhe pjesë të Evropës Qendrore e Jugore, mbetën për dekada jashtë itinerareve kryesore turistike për shkak të rrethanave politike dhe ekonomike.
Ekspertët e udhëtimit paralajmërojnë se, ndonëse këto zona ofrojnë ende përvoja autentike larg turizmit masiv, kjo situatë mund të ndryshojë në të ardhmen për shkak të rritjes së interesit ndërkombëtar.