Gjykata e Posaçme e Shkallës së Parë për Korrupsionin dhe Krimin e Organizuar (GJKKO) ka dënuar më 24 shkurt 2026 ish-inspektorët e IKMT-së, Klajdi Zhillën dhe Geraldo Fuçian, për veprën penale të "korrupsionit pasiv të personave që ushtrojnë funksione publike", në bashkëpunim.
Gjykata caktoi fillimisht nga tre vite burg për secilin, por me aplikimin e procedurës së gjykimit të shkurtuar, dënimi u ul në dy vite burgim. Trupi gjykues, i përbërë nga gjyqtarët Rudina Palloj, Flojer Davidhi dhe Bib Ndreca, vendosi pezullimin e ekzekutimit të dënimit dhe vënien e tyre në provë për dy vjet. Gjatë këtij kohe, ata duhet të mbajnë kontakte periodike me Shërbimin e Provës dhe të mos kryejnë vepra të tjera penale. Gjykata urdhëroi gjithashtu heqjen e të drejtës për ushtrimin e funksioneve publike për pesë vjet dhe hoqi masën e sigurisë "arrest në burg", duke urdhëruar lirimin e menjëhershëm.
Ngjarja ndodhi në gusht të vitit 2025 në Tiranë. Pronari i një lokali i kallëzoi punonjësit e IKMT-së te Prokuroria e Posaçme kundër Korrupsionit dhe Krimit të Organizuar (SPAK), pasi ata i kishin kërkuar 1 mijë euro për të mos prishur tendën pa leje. Policia, me miratimin e SPAK-ut, nisi përgjimet telefonike dhe simuloi dhënien e parave.
Kur 1 mijë eurot iu dorëzuan Klajdi Zhillës, tre kolegët e tij po prisnin në një lokal tjetër pranë. Policia ndërhyri menjëherë dhe inspektorët fshehën paratë në një gotë në banak. Zhillla u largua me një automjet tip Audi, ndërsa tre të tjerët u ndaluan. Fuçian mbeti në arrest në burg si personi që kishte kërkuar ryshfetin, ndërsa Zhillla u shpall në kërkim. Dy të tjerë – një inspektor dhe menaxheri i lokalit – po hetohen në gjendje të lirë.
Policia sekuestroi paratë e fshehura, të cilat përputheshin me numrat serialë të kartëmonedhave të dhëna nga kallëzuesi. Bashkë me to u gjetën edhe 3 mijë euro dhe 27 mijë lekë, të cilat dyshohen se vijnë nga subjekte të tjera për mosprishje të tendave pa leje. Kundër vendimit mund të bëhet ankim në Gjykatën e Apelit kundër Korrupsionit dhe Krimit të Organizuar brenda 15 ditësh nga njoftimi i arsyetuar.