Gjykata e Posaçme kundër Korrupsionit dhe Krimit të Organizuar (GJKKO) ka konfirmuar masat e arrestit me burg për Flodian Plakun dhe efektivin e policisë Rezart Kuçi. Ata akuzohen si pjesë e grupit të Inez Hajrullës, të goditur të shtunën nga Struktura e Posaçme Kundër Korrupsionit dhe Krimit të Organizuar (SPAK).
Grupi akuzohet për krime kundër personit, trafik ndërkombëtar të lëndëve narkotike dhe pastrim parash. Flodian Plaku ndodhet aktualisht në burg për vrasjen e Gentjan Bejtjas në Fushë-Krujë. Ndaj tij rëndon akuza për trafik droge, konkretisht porositjen e 750 kg kokainë nga Ekuadori, në bashkëpunim me Mendu Dukën dhe persona të tjerë të paidentifikuar. Kjo sasi u kap në portin e Roterdamit në Holandë, me destinacion vendet e Bashkimit Evropian. Sipas SPAK-ut, grupi kishte krijuar një mekanizëm financiar të sofistikuar për financimin dhe transportin e lëndëve narkotike.
Rezart Kuçi, efektiv policie në Kukës, u arrestua të shtunën në kuadër të operacionit të SPAK-ut. Ndaj tij rëndojnë tre akuza: shpërdorimi i detyrës, trafiku i lëndëve narkotike dhe pjesëmarrja në grup të strukturuar kriminal. Kuçi akuzohet se i jepte grupit të Hajrullës informacione konfidenciale, ndërhynte paligjshmërisht në sistemin TIMS dhe se ishte porositës i 400 kg kokainë të trafikuar nga Spanja, e cila u kap në Gjermani në dhjetor të vitit 2020.
Përditësime
Rezart Kuçi, ish-shef hetimi krimesh në Vlorë, porositi drogë dhe kishte mjete lundruese, sipas dosjes së SPAK-ut të zbuluar në emisionin 'Në Shënjestër'. Ai bashkëpunoi me Arben Memishajn, të shpallur në kërkim, duke siguruar logjistikë për transportin e drogës, informacione mbi kontrollet policore dhe duke fshirë të dhëna nga telefonat celularë. Kuçi ka shërbyer në DVP Vlorë, Fier, Tiranë dhe Kukës. Hetimi i SPAK-ut nisi në 2022.