GJKKO ka dhënë vendimin për t’i hapur rrugë SPAK-ut në analizimin e pajisjeve elektronike të sekuestruara në kuadër të hetimeve ndaj ish-zëvendëskryeministres Belinda Balluku. Ky zhvillim u diskutua në emisionin Studio24.
Deputeti i Partisë Demokratike, Ivi Kaso, e cilësoi vendimin si pozitiv për ecurinë e hetimeve. “Është një lajm i mirë për prokurorët. SPAK ka vënë në lojë reputacionin e tij dhe ky vendim i jep një tjetër ritëm çështjes”, u shpreh ai.
Sipas Kasos, rëndësia e këtij vendimi qëndron te fakti se pajisjet janë sekuestruar që nga fundi i vitit të kaluar dhe mund të përmbajnë prova të rëndësishme. Ai shpjegoi se vonesat lidhen me kompleksitetin e çështjes dhe numrin e madh të personave të përfshirë. “Në hetime të tilla, me shumë persona, ka pengesa procedurale. Çdo individ të cilit i është sekuestruar pajisja duhet të dëgjohet në gjykatë. Kjo ka sjellë zvarritje të procesit”, deklaroi deputeti.
Kaso iu referua edhe përmbajtjes së mundshme të komunikimeve në pajisje. “Nëse komunikimet rezultojnë të ngjashme me ato mes Ballukut dhe Evis Berberi, mund të dalin në dritë të tjera çështje surprizuese, të cilat do të bëhen publike”, paralajmëroi ai.