Seanca në Gjykatën e Posaçme (GJKKO) ndaj kreut të Partisë së Lirisë, Ilir Meta, dhe Monika Kryemadhit u shty për në 5 nëntor, pasi avokatët nuk morën përsipër përfaqësimin. Mbrojtësit ishin në sallë, por thanë se nuk ishin njoftuar zyrtarisht për vendimin e Gjykatës Administrative të Apelit, i cili pezulloi bojkotin dhe riktheu shërbimin e avokatisë deri në shpalljen e vendimit përfundimtar.
Gjykata u shpreh se vendimi ishte detyrues dhe se avokatët duhej të ushtronin detyrën. Sipas mbrojtësve, Dhoma Kombëtare e Avokatisë nuk kishte njoftuar zbatimin e tij dhe pritej mbledhja e Këshillit të Përgjithshëm të Avokatëve. Avokatët u gjobitën me 30 mijë lekë të reja. Për seancën e ardhshme u caktuan edhe dy avokatë kryesisht, krahas avokatëve të zgjedhur, Arben Peci dhe Artan Simoni.
Meta kërkoi që gjykimi të vijonte dhe të lejohej të mbrohej vetë, duke iu referuar praktikave të Gjykatës Evropiane të të Drejtave të Njeriut. Ai tha se avokatët nuk mund të rrezikonin licencat dhe se mund të merrnin pjesë duke mbajtur shënime. Meta kritikoi gjithashtu mungesën e prokurorit Kllapi dhe kundërshtoi mënyrën se si, sipas tij, po trajtoheshin të drejtat e tij.
Edhe Kryemadhi kërkoi vijimin e seancës dhe e cilësoi bojkotin si shpërdorim të profesionit të avokatit. Prokurori i SPAK-ut, Arben Kraja, tha se akuzat ishin të rënda dhe se procesi nuk duhej të vijonte pa mbrojtës; ai kërkoi shtyrjen e seancës dhe caktimin e avokatëve kryesisht. Kryemadhi akuzoi prokurorinë për shkelje gjatë hetimeve, duke përmendur marrjen e provave, hyrjen në banesë dhe kontrollet.
Pas shtyrjes, Kryemadhi tha për mediat se, sipas saj, procesi po i cenonte të drejtën për mbrojtje. Ajo përmendi gjithashtu njoftimin për vijimin e seancës pa avokatë në një seancë të mëparshme dhe pretendoi se vendimi për bojkotin nuk u ishte njoftuar zyrtarisht avokatëve.
Gjatë seancës, Meta komentoi edhe transferimin e kryebashkiakut të Tiranës, Erion Veliaj, në Fier. Ai pretendoi se Veliajt i ishte hequr ushqimi për shkak të deklaratave kundër presidentit serb Aleksandër Vuçiç dhe tha: “Avokat, gjeni njerëz, çojini bukë, se as bukë nuk i çojnë se shau Vuçiçin”.