Gjykata e Posaçme kundër Korrupsionit dhe Krimit të Organizuar (GJKKO) ka caktuar seancën paraprake ndaj Laert Haxhiut për 4 mars. Haxhiu dyshohet nga SPAK për vepra penale si shkatërrimi i pronës me eksploziv, vrasje me paramendim dhe grup i strukturuar kriminal.
GJKKO ka njoftuar viktimat dhe trashëgimtarët e tyre për të marrë pjesë në proces. Midis tyre janë:
• Rigels Rajku (Noizy), babai Bashkim Rajku, motra Anisa Rajku;
• Arjan Aliço, Xhino Aliço, Besnik Çoku, Erion Çoku;
• Amela Kondi (Selimi), Roza Selimi, Alesia Selimi;
• Xhuljano Xhaferraj, Shpresa Mermali, Kujtim Mermali;
• Boranta Bashaliu, Mustafa Bashaliu, Gazmir Çepele, Kujtim Meta;
• Rexhep Gina, Resmije Turku, Kleonirda Lamçe (Turku), Altin Lamçe;
• Marjus Zejneli, Mario Gjoka, Genci Hida.
Sipas procedurës, kur dosja kalon në gjykim, gjykata njofton viktimat për njohjen e procesit dhe mundësinë për të folur ose për t’u përfaqësuar me avokat. Urdhri i shpalljes publike mban datën 23 shkurt.
Hetimet e SPAK-ut dhe rrëfimi i penduarit Artan Tafani tregojnë se tritoli u vendos në ambientet e lokalit dhe dyqanit të Noizyt në Durrës me urdhër të Haxhiut. Ky veprim erdhi si përgjigje ndaj dhunës së ushtruar nga shokët e Noizyt ndaj Kleviol Ahmetit (Serbiano), nga Lushnja.
Tafani ka dëshmuar: "Kur doli një video në TikTok ku shihej se kishin rrahur Kleviol Ahmetin, Laertin e telefonuan nëna dhe motra e tij dhe i treguan se u ishte dhimbsur shumë Klevio... Laertin e zuri sedra dhe porositi që t’i bëhej një dëm Noizyt, me pretendimin se rrahja kishte shqetësuar familjen e tij."
Përditësime
Artan Tafani ka shtuar në dëshminë e tij në BURIM 1 se Laert Haxhiu i kishte porositur atij dhe Lulit të bëjnë dëm Noizyt.
GJKKO zbuloi detaje të reja për shpërthimin e qershorit 2022 në Durrës. Sulmuesit përdorën rreth 100 g tritoli, të vendosur në murin e jashtëm të një pallati pranë zonës bregdetare. Eksplozivi u ndez me fitil përcjellës, duke dëmtuar dyqanin e veshjeve dhe një lokal në katet e parë dhe të dytë.