Gjykata e Posaçme e Shkallës së Parë për Korrupsionin dhe Krimin e Organizuar ka vendosur të zbusë masën e sigurisë për ish-zyrtarin e Bashkisë Tiranë, Taulant Tushe. Ky i fundit, i cili mbahej në "arrest shtëpie" që prej muajit janar të vitit 2026, tashmë do të paraqitet periodikisht pranë shërbimit të provës si pjesë e masës "detyrim paraqitje".
Taulant Tushe është nën hetim nga Prokuroria e Posaçme (SPAK) lidhur me aferën e njohur si "5D", ku figuron i përfshirë së bashku me dy ish-drejtorë të tjerë, Redi Molla dhe Mariglen Qato. Sipas organit të akuzës, në periudhën kur ushtronte detyrën e Drejtorit të Përgjithshëm të Planifikimit të Punëve Publike dhe anëtarit të Komisionit të Vlerësimit të Ofertave (KVO), Tushe, në bashkëpunim me zyrtarët Enton Punavija, Julian Zanaj dhe Albano Janku, kanë favorizuar në mënyrë të paligjshme kompaninë "5D Konstruksion" sh.p.k në 3 tendera të zhvilluar nga Bashkia Tiranë.
Hetimi pretendon se këtyre zyrtarëve u janë krijuar privilegje të padrejta ndaj operatorëve të tjerë ekonomikë, duke u shpallur fituese në shkelje të rregullave të prokurimit publik. Krahas kësaj çështjeje, Taulant Tushe është gjithashtu nën gjykim për dosjen e inceneratorit të Tiranës.
Përditësime
Apeli i Posaçëm vendosi ndryshimin e masës së sigurisë për Taulant Tushen, duke e kaluar në "arrest shtëpie" në janar 2026. Tushe u arrestua fillimisht në mars 2024.