Gjykata e Posaçme e Apelit ka vendosur të ndryshojë masën e sigurimit për Taulant Tushe, i arrestuar në hetimet për çështjen e inceneratorit të Tiranës. Me vendimin e marrë këtë të martë, gjykata ka zëvendësuar arrestin me burg me arrest në shtëpi.
Taulant Tushe ndodhej i paraburgosur në Institucionin e Ekzekutimit të Vendimeve Penale (IEVP) Fier. Vendimi është përcjellë për ekzekutim në këtë institucion, ku autoritetet pritet ta transferojnë nga paraburgimi në arrest shtëpi.
Çështja e inceneratorit të Tiranës hetohet nga Prokuroria e Posaçme kundër Korrupsionit dhe Krimit të Organizuar (SPAK), me fokus dyshime për shpërdorim detyre dhe korrupsion në procedurat për ndërtimin dhe funksionimin e inceneratorit. Hetimet vijojnë.
Taulant Tushe rezulton i akuzuar edhe në çështjen "5D", në kompetencë të SPAK-ut, që lidhet me dyshime për afera korruptive dhe shkelje të ligjit në tendera dhe projekte publike të institucioneve vendore. Kjo çështje është në fazë hetimi.