Prokuroria e Posaçme Kundër Korrupsionit dhe Krimit të Organizuar ka dorëzuar zyrtarisht në Gjykatën e Posaçme kërkesën për gjykimin e 10 personave, të cilët akuzohen për abuzime financiare në kuadër të projektit të inceneratorit të Tiranës. Sipas hetimeve, dëmi i shkaktuar arrin vlerën e 30 milionë eurove.
Personat e dërguar për gjykim janë:
• Mirel Mërtiri
• Klodian Zoto
• Dashamir Ymeraj
• Arjola Kodra
• Denisa Tollkuçi
• Elton Bualli
• Endrit Habilaj
• Renato Nallbani
• Giuseppe Ciaffaglione
• Marc Richard Lappat
Ndaj këtyre shtetasve rëndojnë akuzat: "Mashtrim me pasoja të rënda", "Pastrim i produkteve të veprës penale ose veprimtarisë kriminale", "Grupi i strukturuar kriminal" dhe "Kryerja e veprave penale nga organizata kriminale".
Sipas njoftimit të institucionit të akuzës, të pandehurit do të gjykohen në mungesë. Që nga qershori i vitit 2024, kur u lëshuan masat e sigurimit personal, asnjë prej tyre nuk është ndaluar nga Policia e Shtetit, pasi rezultojnë të jenë larguar jashtë vendit. SPAK bën të ditur se ky zhvillim përbën vetëm një pjesë të dosjes voluminoze, ndërsa hetimet po vijojnë për fraksione të tjera të këtij hetimi.