Prokuroria e Posaçme Kundër Korrupsionit dhe Krimit të Organizuar (SPAK) ka depozituar në Gjykatën e Posaçme kërkesën për gjykim ndaj 12 shtetasve dhe dy shoqërive tregtare, Integrated Energy BV SPV dhe Integrated Technology Services, për procedimin penal të lidhur me inceneratorin e Tiranës. Hetimet kanë evidentuar shkelje ligjore gjatë procedurës koncesionare të zhvilluar nga Ministria e Mjedisit, e cila kulmoi me lidhjen e kontratës më 31 gusht 2017.
Sipas dosjes hetimore, në krye të grupit kriminal qëndrojnë biznesmenët Mirel Mërtiri dhe Klodian Zoto. Të pandehurit e tjerë të dërguar për gjykim janë Dashamir Ymeraj, Arjola Kodra, Giuseppe Ciaffaglione, Denisa Tollkuçi, Elton Bualli, Endrit Habilaj, Renardo Nallbani, Marc Richard Lappat, Michael Peter Druijts dhe Ilir Dedja.
Organi i akuzës bën të ditur se, ndonëse investimi i parashikuar në kontratë ishte 128,2 milionë euro, deri në momentin e sekuestros preventive në vitin 2023, janë realizuar investime në vlerë prej rreth 21 milionë eurosh. Përmes një skeme të faturave fiktive, grupi dyshohet se ka pastruar rreth 30 milionë euro nga të ardhurat e koncesionarit.
Hetimi gjithashtu ka vënë në dukje rolin e ish-zyrtarëve të Ministrisë së Mjedisit në favorizimin e kompanisë koncesionare gjatë procesit të përzgjedhjes. Ish-ministri i Mjedisit, Lefter Koka, dhe ish-sekretari i Përgjithshëm, Alqi Bllako, janë dënuar më parë nga gjykata për vepra penale që lidhen me korrupsionin dhe shpërdorimin e detyrës në kuadër të projektit të inceneratorëve.
Përditësime
Në kuadër të dosjes për inceneratorin e Tiranës, SPAK ka dërguar për gjykim 12 persona. Hetimet kanë vërtetuar se projekti ka funksionuar si një skemë fantazmë, ku nga 120 milionë euro të arkëtuara, janë investuar vetëm 21 milionë euro. Prokuroria identifikoi zhdukjen e 99 milionë eurove, duke zbuluar se mekanizmi i përvetësimit përfshin mbi 30 milionë euro fatura fiktive.