Gjatë një operacioni të zhvilluar mbrëmjen e së shtunës, shërbimet e Policisë së Vlorës bënë të mundur lokalizimin dhe arrestimin e Renardo Nallbanit. I kërkuari u kap në një vilë në zonën e Palasës, ndërsa raportohet se forca të shumta policore rrethuan ambientin për të finalizuar operacionin. Nallbani ishte shpallur në kërkim prej rreth 2 vitesh nga SPAK në kuadër të hetimeve për inceneratorin e Tiranës.
Ndaj Renardo Nallbanit rëndojnë akuza për disa vepra penale, të cilat përfshijnë:
• “Pastrim i produkteve të veprës penale ose veprimtarisë kriminale”, kryer në bashkëpunim të veçantë në kuadër të grupit të strukturuar kriminal.
• “Grup i strukturuar kriminal”.
• “Kryerja e veprave penale nga organizata kriminale dhe grupi i strukturuar kriminal”.
Sipas informacioneve, Nallbani ka qenë një nga drejtuesit e biznesit të inceneratorëve. Për më tepër, dyshohet se ai drejtonte fillimisht biznesin e dherave që lidhej me këtë projekt. Pas arrestimit, materialet procedurale pritet t'u referohen organeve kompetente për ndjekjen e mëtejshme të procedurave ligjore.
Përditësime
Autoritetet bënë me dije se operacioni i koduar 'Vila' u ekzekutua nga Forcat Operacionale të DVP Vlorë, në bashkëpunim me Drejtorinë e Forcës së Posaçme Operacionale dhe Forcën Kombëtare të Sigurisë, Njësia Fier. I arrestuari është një 50-vjeçar nga Fieri, ndaj të cilit Gjykata e Posaçme kundër Korrupsionit dhe Krimit të Organizuar (GJKKO) kishte lëshuar urdhrin e arrestit në burg që në korrik të vitit 2024.