Gjykata e Posaçme ka lënë në burg biznesmenin Renardo Nallbani, pasi rrëzoi kërkesën e avokatit të tij për zëvendësimin e masës me garanci pasurore. Nallbani, i cili u arrestua dy ditë më parë në një vilë në Palasë, kërkohej prej më shumë se dy vitesh nga Prokuroria e Posaçme kundër Korrupsionit dhe Krimit të Organizuar (SPAK).
Prokurori i çështjes, Dritan Prençi, kërkoi nga gjykata lënien në fuqi të masës së arrestit për shkak të dyshimeve mbi përfshirjen e të pandehurit në tri vepra penale:
• "Pastrim i produkteve të veprës penale ose veprimtarisë kriminale"
• "Kryerje e veprave penale nga organizata kriminale"
• "Grup i strukturuar kriminal"
Renardo Nallbani është pjesë e një dosjeje me 12 të pandehur në lidhje me koncesionin e inceneratorit të Tiranës. Sipas hetimeve të SPAK, përgjatë gjashtë viteve, nga viti 2017 deri në vitin 2023, përmes kompanisë së inceneratorit janë pastruar të paktën 30 milionë euro. Nallbani konsiderohet si një prej drejtuesve të këtij biznesi, ndërsa në skemë përfshihen edhe biznesmenët Mirel Mërtiri dhe Klodian Zoto, të cilët vijojnë të jenë në kërkim. Nga lista e të akuzuarve në këtë fraksion të hetimit, Nallbani është i vetmi person që deri më tani ndodhet në pranga.