Një rast gjuajtjeje me armë zjarri është raportuar rreth orës 13:30 në rrugën "Zahir Pajaziti" në Podujevë.
Zëdhënësja e Policisë së Kosovës për Rajonin e Prishtinës, Flora Ahmeti, ka konfirmuar se menjëherë pas marrjes së informacionit, njësitë policore kanë dalë në vendngjarje dhe kanë arrestuar personin e dyshuar.
“Rreth orës 13:30 është raportuar për një gjuajtje me armë zjarri në rrugën ‘Zahir Pajaziti’ në Podujevë. Menjëherë pas marrjes së informatës, policia ka dalë në vendin e ngjarjes dhe ka arrestuar personin e dyshuar”, ka deklaruar ajo.
Policia ka nisur hetimet për rrethanat e rastit. Sipas të dhënave fillestare, nuk raportohet për persona të lënduar.
Raportimet në media tregojnë se i dyshuari është parë me kallashnikov në dorë në mes të qytetit. Pamje video të publikuara ilustrojnë ndjekjen e tij nga policia dhe largimin nga vendngjarja.
Hetimet vazhdojnë për zbardhjen e plotë të rrethanave.
Përditësime
Video të reja nga IndeksOnline tregojnë të dyshuarin, një të ri të dyshuar për gjuajtje me kalašnikov, duke u rrëzuar në asfalt gjatë arratisjes.
Policia e ka klasifikuar rastin si vrasje në tentativë.
Detajet e reja:
- I dyshuari gjuajti drejt dy viktimave meshkuj kosovarë, pa i goditur.
- U gjetën 6 gëzhoja në vendngjarje.
- Dy vetura u dëmtuan nga predhat.
- U konfiskua AK-47 me karikator 15 fishekësh.
- I dyshuari është dërguar në mbajtje me vendim të prokurorisë.