Një gjykatë në Mançester ka rrëzuar apelin e Igli Hazizajt kundër deportimit dhe ka urdhëruar kthimin e tij në Shqipëri. Gjykatësi Chris Cole arriti në përfundimin se 28-vjeçari kishte fabrikuar rrëfimin se ishte trafikuar në Mbretërinë e Bashkuar dhe ishte detyruar të punonte në ferma kanabisi.
Hazizaj tha se kishte frikë për jetën nëse kthehej në Shqipëri, për shkak të një borxhi që familja e tij i kishte një bande të krimit të organizuar. Ai pretendoi se ishte trafikuar në Mbretërinë e Bashkuar dhe mbajtur në ferma kanabisi pasi babai i tij kishte hyrë në borxhe me një bandë lokale. Sipas tij, kthimi do ta vinte në rrezik serioz.
Në gjykatë u përmendën fotografi të publikuara në rrjetet sociale nga ish-partnerja e tij. Ato e tregonin duke i propozuar martesë në Mançester, në një festë beqarie në Uells dhe në ceremoninë e diplomimit të saj në Swansea. Ministria e Brendshme kundërshtoi pretendimet e Hazizajt dhe paraqiti të dhëna fluturimesh që, sipas saj, tregonin se ai kishte udhëtuar disa herë drejt Shqipërisë dhe prej saj në periudha kur pretendonte se mbahej rob.
Në shkurt të vitit 2025, Hazizaj u dënua me dy vjet burg për komplot për prodhimin e kanabisit. Gjykata e Kurorës në Carlisle dëgjoi se ai ishte “organizatori kryesor i lëvizjes” në një operacion ku tri shtëpi u kthyen në ferma kanabisi, me mundësi fitimi prej më shumë se 2 milionë paundësh në vit.
Në dhjetor të vitit të kaluar ishte dhënë urdhri për deportimin e tij, të cilin ai e apeloi. Gjykata dëgjoi gjithashtu se Hazizaj ishte dënuar me nëntë muaj burg pasi u kap duke u përpjekur të hipte në një fluturim nga Tirana për në Barcelonë me pasaportë greke të falsifikuar.
Gjykatësi Cole tha se Hazizaj nuk kishte arritur të provojë se rrëfimi i tij ishte i vërtetë. Ai tha se historia e udhëtimeve, qasja në dokumente identiteti të falsifikuara dhe mënyra e jetesës së Hazizajt në Mbretërinë e Bashkuar nuk mbështesnin pretendimin se ai ishte viktimë e trafikimit.
Hazizaj nuk mori pjesë në seancën dëgjimore të 28 tetorit. Gjykata dëgjoi se përpjekjet për ta gjetur përmes ish-partneres dhe firmës ligjore që e kishte përfaqësuar më parë nuk patën sukses.